صبحكم الله بالخير .... مساكم الله بالخير
.
.
.
.
شوفوا الأرخص وخذوا وحده منها
أدري إن العنوان لايمت للسالفه باي صله <<--- ياعيني على اللغة
بس وش أسوي هذي العولمة وما تسوي <<--- ياشين اللي يسمع بالثقافه
الزبده يا طويلين العمر التماسيح ....وطويلين اللسان السحالي
أبقول لكم أخر ما جادت به قريحتي
ندخل في صلب الموضوع <<<< متعوب على هالجملة
ابداً القصة
المهم أبوي قال لي ترى بتروح تشهد معي في المحكمه بكرة الساعة 9 الصبح قلت أيه أصبح أجل بالليل مادريت إلا وذاك الكف اللي هز دميجتي هز شوي وأفقد الذاكرة
المهم يوم جت الساعه عشر بالليل كنت جالس أنا وسعيدان ورويشد على الرصيف عند البقالة
قلت يالله أنا بروح أنام عندي مشوار مع أبوي بكرة لازم أصحى بدري
المهم رحت يوم دخلت البيت إلا وأشوف أبوي جالس في الملحق يشوف القناة الإيطالية <<< لاتفهمون أبوي غلط
وأجلس معه شوي إلا واشوف هالمزايين تصدقون المزايين اللي عندنا أبل واللي عندهم أوادم
أعنبوا بليسهم رجالهم أزين من حريمهم
لا وبعد يوصل عمر الواحد 60 سنه مايصلع
وإنا إذا الواحد دخل العشرين طاح شعره وصلع وأتحداك تلقا واحد عنده ظفر مهوب مكسور وأحسان واحد ريحته دخان وإلا تعميره وهذا غير الشهابة
أنا مدري ليه البنات يرضون يتزوجونا
صحيح إن كراعينهم وركبهم سود <<< بس أهم شي الأخلاق
المهم نرجع لمحور موضوعنا <<<<< والله مثقف لإنه أستخدم كلمة محور تدرون أنه بغى يستخدم كلمة راس حربه
سريت لغرفتي أفكر في هالطليان
المهم مادريت إلا وأميمتي تصحيني تقول قم أفطر الساعه 8
أبوك يحتريك <<< ماقالت قم تروش وأنزل أفطر متعودين إحنا قراااااوا
المهم غسلت وجهي ونزلت وأفطرت وطلعت أنا وأبوي عشان أروح أشهد معه
يوم وصلنا للمحكمة إلا وأبوي يشوف أبو رويشد عند باب المحكمة عشان نشهد معه انه شاري أرض في وادي لبن
يوم دخلنا عند القاضي قال بطاقاتكم يوم أخذ البطاقات وناظرها
قال وين متكي ورا النت قلت سم قال بطاقتك منتهيه رح جددها وتعال
مادريت إلا وذاك الكف اللي يمشي مليون
قال وراك ماعلمتني إن بطاقتك منتهيه
قلت وش يدريني من يوم طلعتها وأنا حاطها في الشنطة أخاف أنها تخرب
على طول جرني أبوي بأذني قال أمش نروح نجدد بطاقتك ونرجع بسرعة
دخلنا الأحوال المدنيةوقدمت أوراقي عشان أجدد البطاقة إلا وما دريت إلا وينادون متكي ورا النت متكي ورا النت
قلت هاه وش تبي قال تعال مدير الأحوال يبيك ضروري
قلت عسى ماشر وش فيه
أبوي أرتاع قال عسى مانت مسوي شي قلت أنت تعرفني يبه ماقد سويت شي
دخلت أنا وأبوي عند مدير الأحوال قال أنت متكي قلت أية
قال وينك أعنبوا بليسك لنا سنين وأحنا ندورك وينك ضايع فيه ؟؟
قلت في بيتنا قال أبوك يدورك دواره ماخلى خفس إلا ودورك فيه
والتفت على أبوي
قلت هذا أبوي كل يوم أنا مقابل وجهه ولازم أخذ منه كف في الدخلة و الطلعة ما أرتاح إذا ما خذت كف منه
قال أبوي للمدير أنا أبوه وش فيه
قال المدير لا مهوب أنت أبوه الحقيقي قال أبوي وشووووو
قال المدير أبوه الحقيقي السفير الإيطالي السابق زوجته والده في نفس المستشفى ونفس الوقت اللي ولدت زوجتك فيه وتلخبطوا المواليد وأنت ولدك الحقيقي شفه في دار الرعاية رح أستلمه
ومادريت إلا وكف جاني على دميجتي وقال ومخليني أربيك كل هالسنين وأصرف عليك
قلت أحترم نفسك ولا تمد يدك و إلا رفعت عليك قضيه
قال المدير أستريحوا شوي
وأروح للحمام وأنتم بكرامة وأجلس أشوف خشتي في المراية وأرفع خشمي بيدي وأنا أقول ياربيه ليه عيوني زرق وشعري أشقر
ماخذنا نص ساعة إلا والقنصل الإيطالي جاي
ويسلم على المدير ويقوله شكراً لك إنك لقيته <<<< أقروا هالجملة باللغة العربية الفصحى
قال القنصل يالله معي عشان نحجز لك تروح لإيطاليا أبوك يحتريك هناك
سكنوني في فندق عجزت أحفظ أسمه الظاهر إن أسمه (( أنطر تنتنتتل ))
جلست أفكر قلت طيب سراويلي وفناييلي <<< هذا أكبر همه
وأصدقاني سعيدان ورويشد أبخليهم
و بشوف الاعبين على طبيعة
أبصادق أخت مالديني وإلا توتي
ياسلام من بعد الكبسة والمرقوق والحنيني أباكل معكرونه طويله ومراصيع عليها طماط وجبنه <<< يسمع في البيتزا
وأشوف الدوري الإيطالي على الطبيعة
وبيصير عندي صديقه مثلهم
وإذا وصلت وش أقول لابوي الجديد يبه وإلا بابا أحظنه وإلا ما أحظنه
وأمي الحقيقيه أحبها على راسها وإلا أحبها على خدها مثل مايسوون الطليان
وإذا أعرست هناك بيجي لي عيال طليان وإلا لا
أخاف يجي لي تيوس وخرفان
طيب وشلون أباكل بيدي وإلا بشوكه مثلهم
طيب وإذا ما عرفت أكل بشوكه من يعلمني وشلون أبتكلم معهم وأفهمهم على أي شي أبيه
والله الحالة وش أسوي تعبت من التفكير
مادريت إلا وباب الغرفة يطق وروح وأقول يس <<< إيطالي وش عليه
إلا وأفتح الباب وأشوف رويشد وسعيدان لابسين ترنقات وزارة المعارف اللي يوزعونها علينا أول في المدرسة
((( برا الموضوع )))
تدرون أول ماكتبت كلمة ((( ترنقات ))) طلع غلط إيملائي كخخخخخخخخخخخخخخ
نرجع لموضوعنا دخل رويشد وسعيدان بشناطهم قلت خير وش عندكم لابسين ومتكشخين وجايبين شناطكم
قالوا بنسافر معك نبي ناكل معكرونة طويلة ولحم أستكات مثلك <<< ستيك لتوضيح
قلت أخاف ما يوافقون عليكم ما معكم جوزات
قلت خلاص روحوا الحين لبيوتكم وأبمركم بكرة أبوووك ياتصريف <<< مايبي يفشلونه
قالوا طيب
وتوني نايم إلا وجاء القنصل قال يالله قم موعد الطيارة بعد ثلاث ساعات هذا لبس اللبسة عشان نمشي
وأدخل الحمام وأتروش وأتعطر بعطر الليمون حق المغاسل
وألبس اللي عطاني
يوم طلعت إلا ويزعق ذيك الزعقه ذكرني بأبوي التقليد
قلت وش فيك ؟؟؟ قال ليش لابس روب الحمام
قلت وش يدريني لقيته معلق على الباب ولبسته وبعدين مناسب مع الأسود <<<< اااابوك يااالذوق
فصخت الروب وقليبي يفرفر يبيه
رحنا للمطار وركبت الطيارة وإحنا في الجو
قال الطيار أربطوا الأحزمة فيه خلل في المحرك
وأنا اللي صار وجهي أزرق والعالم تصايح ما دريت إلا والطيارة يا أما طالعه و إلا نازله
ما أسمع إلا طاااخ طيخ وأنا متمسك في الكرسي
ما دريت إلا وذا اللي يرفسني برجله يقول قم جعلك القامة تأخرنا على المحكمة
وأنا اللي أطمر أحب راس أبوي اللي ما قد حبيته وأقول الحمد الله أنه حلم
اخو مزنه
مسجات
لمسات
يرجى
التسجيل في إيميل صحيح حتى لاتتعرض العضويه للـ
حذف
الإهداءات
العرض العادي
