خلّها تبرق ورا الصمّان وتسيـل المسيلـه=دام خيّال المهور العـوب فـالشـدّات منّـا
الزمل في مهجتـي ممسـاه وهنيّـا مقيلـه=والله أنه من ضعنّا راح يرعى فـي ضعنّـا
والله أني ما أتنازل عنك يالصفرا الأصيلـه=دام لي راسن يزوم ولـي طواريقـن تغنّـا
يوم قالت يالسنافي قلت لبّـي يـا دخيلـه=قالت البارح جرى دمعي على الخدّيـن منّـا
قلت في ربّك وريضان الزهر هاذي وشي له=ما سقاها ألا غـلاك إللـي ربينـاه وسكنّـا
صاحبي ياويل جيب صويحبك عقبك أويلـه=لا خلت من ضحكتك ذيك الصروح إللي تبنّـا
لا رحل حلمن نزخرف له بيوت وننتمـي لـه=وأمحلت خرّ الطواريق ودنـا الليـل وتدنّـا
قبّضيني يالهبايـب غـرّة الغيـم وهميلـه=لين يرتع في خفايا الـروح رعبوبـن زبنّـا
وإرعدي بي يالرعود وفضفضيني يالمخيله=وشرّقي بي لا أظلمت ذيك الوجيـه وكلّحنّـا
وإعتزي بي مثل خيّالن على عـزوة خليلـه=ساعتن يستنشق البـارود كيـف ويستجنّـا
المشاعر راهيه والدرب مخطور ويبـي لـه=مسرجاتـن لا ظمينـا للغـمـام يـورّدنّـا
درهمي بي يا ذلول الشعر صوب المستحيله=إن كسبنا الصعـب وألا قولتـن والله بذلنـا
شاعرن شاف الجدي في رمسته راعي طويله=والهبايب تنفض غصون الشجر منّـا ومنّـا
الزمن جافيه عقب الطيب من قبل أمس عيله=والوجيه إللي خذن منّا الغلا وشّـن عطنّـا
الوفا يلهـث ورا بيبـان نسّـاي الجميلـه=سجّ ما كنّه شرب من كفي الطيـب وتهنّـا
إيعناله وإيعنالي وإيعني لـي وإيعنـي لـه=عالقـن علّـق معاليـق العريـق وأعلقنّـا
يعقب إللي يوم ضاع وضيّع الوالـي دليلـه=جا يحدنّه عيون إللي على الضيـق يحدنّـا
روّح يدفدف مع السّارين بضلوعـن نحيلـه=عقبهـا عـوّد يلـوج لسيّنـه حنّـا وحنّـا
إيتطاولنـا فقيـر الحـال معتـرّ بقليـلـه=ما درا أنّه لـو تعنّـا للثريّـا مـا وصلنـا
علموه يرش مقياله ويشـرب مـن صميلـه=مالـه عظامـن يشيلنّـه عشـان يقابلنّـا
إنصحيه وفهّميه وسولفيلـه وإشرحـي لـه=أنتي أخته علميـه إن الوطـن هـذا وطنّـا
يالحبيّب للصمايل قلب وضلوعـن تشيلـه=إسترح يا الأجودي شوري عليـك ولا تعنّـا
ما نورّدها على الجمهـاة بعزومـن هزيلـه=يوم جينا عزوتن يصفق لها المـوت يتثنّـا
لا وطينا القاع شوف القاع منهي تنحني لـه=ما هدر وأطبق على روس الجمال ألا جملنـا
أبشري يا عزوتي لا حزّم الصايـح شليلـه=والله ألا نسوقها شلفـا تجغّـم مـن زعلنـا
أبشري باللي يشيل الحمل عنك ويرتكي لـه=شاعرن باسمك تغطرس بأسمه الحرف وتغنّا
والعذارى إللي يشبّن لا سمنا الوضّاح ليلـه=جعلهن لا قصّـرت بيـض الفعايـل يفقدنّـا
والوعد لا رفرف البارق على راس الطويلـه=والمشاعر تشتعل و ( غزيّل السابق ) تحنّـا

..
صاحبي ياويل جيب صويحبك عقبـك أويلـه
لا خلت من ضحكتك ذيك الصروح إللي تبنّـا ..!

لا رحل حلمن نزخرف له بيوت وننتمي لـه
وأمحلت خرّ الطواريق ودنـا الليـل وتدنّـا ..!


..
][.. آبن الرشيد ..][
آبدآع و جمآلٌ يتلوهـ جمـآل ..
رآئعٌ بقدرِ إعجـآبي ب تلكْ الحروف الذهبيهـ ..
وصح السآنك ولآهآن فكركـ ..

..
[]